Texte d'une chronique l’époque relatant les funérailles de Charles VI :
« L'an 1422, le mercredi 21 octobre, feste des XI milles vierges, environ 6 heures du matin, le roy Charles VI, que Dieu absoille, trespassa, et que pour ce que on peut promptement faire l'obseque dudit roy Charles, son corps vuide des entrailles et rempli d'espices et d'herbes sentans bon, et puis son corps fut mis en coffre plombé, et gardé en la chapelle de l'hostel de St-Pol, jusques au X de novembre en suivant. Et ce pendant furent chantées messes et le service des trespassés solemnellement en ladite chapelle, chascun jour, par les gens d'esglises et collèges de ladite ville de Paris ».
Premierement une lectiere fut faicte a limons, devant et deriere, et lesdits limons furent fourrez et couverts de cuyr ou de drap noir pour moins blesser ceulx qui portoient le corps, car le coffre ou le corps estoit boute avec le plomb et autres choses qui estoient dedans pesoient bien XIIIIc. Ladicte lectiere estoit tellement faite que en passant par les portes de l'hostel de Saint-Pol, de l'esglise de Nostre-Dame et par les rues estroites on la restraignoit, et quant on estoit oultre passe en place large, on la relargissoit. En icelle lectiere fut mis le coffre a tout le corps du roy, et sur ledit coffre on mit une coiste et un coissin et deux draps de lin, un coissin linceulx beaux et deliez ; et par-dessus, en maniere de couverture, ung grant poille de drap d'or sur champ vermeil, borde autour d'ung bort de bleu azur compone de fleurs de liz d'or et de brodure ; et estoit ledit bort large d'environ demi_pie, et ledit poille estoit si large que de chascun coste il tregnoit a terre ou bien pres ; et si estoit ladite lectiere haulte, prez de la haulteur d'ung homme, on ne veoit pas le coffre, car il estoit mussle sous la coiste et ledit poille. Mais sur toutes les choses fut mise l'ymage du roy, la plus propre qu'on la peust faire, à la semblence du Roy, vestu de cote Roial et par-dessus un mantel de mesmes le drap du poille ; et estoit le mantel fourre d'ermines ou de loutres ; les chausses avoit semellees d'un drap de soye azure tisu à fleur de liz ; et ses mains avoit ung gans blans ; et sur sa teste avoit une couronne ; en l'une de ses mains tenoit un ceptre, et en l'aoutre main une verge, comme celle qui fut envoiee du ciel, car au bout avoit en semblance une main qui seigne ou beneist ; et estoient lesdites couronne, ceptre et verge tout d'une matière, en façon d'argent dorée. (…)Maistres d'ostels, eschansons, pannetiers, fruictiers, varlez de chambre, fourriers, varlez de porte et tous les officiers de l'ostel du roy furent vestus de brunete ; les eschansons, pannetiers et varlez de chambre portoient chascun une torche pesant IV livres, aux torches et sur leurs pointrines et espaules avoient escussons aux armes de France ; et estoient bien deux cents portans lesdites torches. Le corps et la lectiere furent portes par les varlez de porte, car c'est leur droict ; et estoient bien cinquant aux limons d eladite lectiere, qui estoient tous las de la porter et bien souvent les convenoit reposer et mectre la lectiere sur deux grands trecteaux propices qu'on portoit apres. Ainsi fut porte le corps a Nostre-Dame, à l'heure de vespresL'ordre des gens fut tel : les ordres mendiens, c'est assavoir Jacobins, Cordeliers, Carmelites et Augustins à belle procession furent les premiers ; les colleges si comme Sainte-Catherine du Val des escolliers, les Mathurins, les Billettes, Sainte-Croix et leurs semblables apres ; les paroisses apres ; les esglises collegiaux si comme Saint-Benoist le bien tourne, Saint-merry le Sepulcre, Saint-Germain-l'Auxerroiz et leurs semblables apres ; les colleges de Nostre-Dame et de la Sainte-Chapelle du Palais apres ; et tous lesdites gens d'esglise, deux à deux, alloient d'un des costez de la rue et les escolliers et suppotz de l'université de Paris alloient de l'autre costé de la Rue. Apres lesdites processions alloient neuf prelaz, que evesques que abbes, revestus en chappes noires et mitres blanches, entre lesquelx estoit le patriarche de Constantinople, lors administrateur de l'evesche de Paris, lequel fist l'office. Le Prevost de Paris aloit entre les prelats et le corps, devant la lectiere, une verge en sa main. Les chambellans du roy, varlez trenchans et escuiers d'escuierie et les maistres d'ostel aloient entre le prevost et la lectiere. Les quatre presidens de parlement, vestus de leurs manteaulx vermeils fourrez de menu vair, tenoient les quatre cornes du poile et les seineurs et les greffiers de parlement et aussi les quatre notaires de ladite court entour la lectiere d'ung couste et d'autre, et tenoient ce que pendoit du poile, car c'est leur droit que ilz qui en parlement representent la personne du roy et qui gouvernent la justice souveraine du royaume soient au plus pres du corps du roy. Les huissiers de parlement, tenans leurs verges, estoient aux quatre cornets de la lectiere, emprez les presidents pour garder que nulles gens ne se boutassent entre eulx ; et le premier huissier avoit son bonnet fourre en la teste, aussi les presidents et les seigneurs et greffiers de parelement avoient vestus leurs chaperons fourrez, et ainsi comme ils les ont en ladicte [cour] dudit parlement.
Le Prevost des marchans et eschevins de la ville de Paris portoient un ciel hault, a huit bastons, tels que on a accoustume de porter sur le corpus domini le jour de la Feste-Dieu aux processions, lequel ciel estoit grant et large et bien hault et si estoit d'un mesme drap du poile. Et quant lesdits prevost et eschevins estoient las de porter ledit ciel, qui estoit bien pesant, on mettoit en leur lieu notables bourgois, qui le portoient jusques a ce qu'ils estoient laz
Le duc de Bedford, regent le royaume, le chancellier de France, les maistres des requestes de l'hostel et autres conseillers et officiers du roy aloient derriere la lectiere, et apres eulx le peuple en grant nombre ; et alant par les rues veissiez gens aux huiz, aux fenestres et sur les estaulx qui plouroient et menoient grant deuil et n'estoit pas sans cause, car grant desolacion fut et ne savoient se de longtemps auroient roy en France. Ainsi fut porte le corps du bon roy a Nostre Dame… "
[Le lendemain…]
" Et environ douze heures on reassembla en ladite esglise Nostre-Dame pour aller a Saint-Denis, et fut porte le corps par les gens et en l'ordre du jour precedent. Et quant on fut hors la porte Saint Denis, qu'on dit la Bastille, les varlez de porte du roy, qui jusques la avoient porte le corps, le laisserent, et les hannouars, porteurs de sel, le porterent, car c'est leur droit qu'ilz doivent porter le corps du roy jusques a la prouchaine croix de Saint-Denis. Mais pour ce que le fardel estoit trop pesant, les religieux de Saint-Denis, qui illec le devoient prendre et porter en leur esglise, donnerent de l'argent ausdits hannouars, lesquels le porterent en l'esglise de Saint-Denis.
Et le landemain qui fut mercredi feste Saint-Martin, la messe de Requiem fut chantee a grant solemnite ; et fist l'office ledit patriarche, l'abbe de Saint-Denis fut le diacre et l'abbe de Saint-Crespin le soubz-diacre. L'abbe de Saint-Magloire et l'abbe de Saint-Germain-des-prez tindrent le cueur avecques quatres des religieux de leans, et tous les autres religieux estoient es haultes chaieres en cueur, vestuz de chappes à fleurs de liz. En la premiere chaiere qui est le lieu de l'abbé, estoit le duc de bedford et les chambellans après lui, et puis une partie des seigneurs de Parlement et les religieux apres ; et de l'autre coste du cueur estoient les evesques de Theroenne et de Chartres et une partie des seigneurs de Parlement, et les religieux apres.
Quant la messe fut chantee, le corps fut porte enterrer, en la chapelle d'empres, le degre devers la bonne main ou furent enterres ses pere et mere. Et fut porte le corps du cueur jusques a la sepulture par les varletz de porte du roy, qui paravent l'avoient porte.
Apres l'enterrement et illec mesme avant que aucun se partist, ung crieur de corps cria a haulte voix : Priez pour l'ame de tres-excellent prince Charles VI, roy de France, etc., ainsi qu'il est accoustume faict. Et tantost apres ung herault cria a haulte voix Vive Henry par la grace de dieu Roy de France et d'Angleterre ; ce fut le filz du bon Roy d'Angleterre [Henri V] hered. et regent de France et madame Catherine fille dudit roy Charles ; bien fut jeune et grant seigneur car encores n'avoit pas ung an accomply et fut Roy de deux tels Royaulmes ; Dieu lui doint bon em.
Ces choses ainsi faites, le disner fut appareille en l'abbaye, a tous venans.
Tandis qu'on faisoit le service, on fist une donnee de six doubles, dont les cinq valoient huit deniers parisis, à tous ceux qui y voudroient venir ; et la recevrent plus de cinq mille personnes. Dieu lui presente a l'ame,... "